Mae’r cyfnod cofrestru ar gyfer Arolwg y Rhwydwaith i Ysgolion Cynradd Bellach ar agor

A ninnau’n bartneriaeth genedlaethol rhwng Llywodraeth Cymru, Prifysgol Caerdydd ac Iechyd Cyhoeddus Cymru, mae’r Rhwydwaith Ymchwil Iechyd mewn Ysgolion yn cefnogi ysgolion i ddeall anghenion iechyd a lles eu dysgwyr yn well, ac ymateb yn well i’r anghenion hyn. Fe wnaeth y rhwydwaith, a arferai ganolbwyntio ar ysgolion uwchradd, ehangu i leoliadau cynradd yn 2024 ac mae’n cael ei ddatblygu ymhellach nawr, gan gynnig cyfle i ysgolion gyfrannu at raglen a gydnabyddir yn genedlaethol sy’n llywio polisi ac ymarfer ar draws Cymru.

Bydd ysgolion sy’n cymryd rhan yn cael adroddiadau adborth teilwredig lefel ysgol, sy’n darparu mewnwelediadau gwerthfawr i brofiadau, ymddygiadau a lles dysgwyr. Gall y mewnwelediadau hyn gynorthwyo ysgolion ag amlygu cryfderau, cynllunio camau gweithredu targedig, a chysoni eu gwaith â’r Cwricwlwm i Gymru a dulliau ysgol gyfan ar gyfer iechyd meddwl a lles.

Yn holl bwysig, lluniwyd y Rhwydwaith gydag ysgolion mewn golwg. Mae dulliau casglu data yn ymarferol ac yn hylaw. Trwy gymryd rhan, bydd ysgolion cynradd hefyd yn ymuno â chymuned genedlaethol sy’n tyfu, gyda chyfleoedd i rannu dysgu a chydweithredu ag eraill sy’n ymrwymo i wella deilliannau i blant.

Gwahoddiad i gofrestru

Mae gwahoddiad i gofrestru wedi cael ei anfon yn uniongyrchol i flychau negeseuon e-bost ysgolion cynradd, gyda’r dyddiad cau ar 24 Gorffennaf. Mae arweinwyr lles ysgolion yn cael eu hannog i ymateb o fewn y cyfnod hwn i sicrhau eu lle yng ngham nesaf y gwaith pwysig hwn.

Mae ehangu’r Rhwydwaith i addysg gynradd yn adlewyrchu ymrwymiad cyffredin i ymyrraeth gynnar ac atal, gyda’r rhwydwaith bellach yn gwreiddio mewn ysgolion cynradd ac yn cefnogi plant i ddatblygu ymddygiadau iach a gwydnwch yn ifanc.

Mwy o wybodaeth

Am ragor o wybodaeth, ewch i wefan y Rhwydwaith. Hefyd, gallwch fwrw golwg ar astudiaethau achos y Rhwydwaith, sy’n arddangos sut mae ysgolion wedi defnyddio data i lywio ymarfer, cryfhau’r ddarpariaeth les, a gyrru gwelliannau ystyrlon sy’n seiliedig ar dystiolaeth.